Pa un mata por florece e tin mester di awa, di aire, di solo y di diferente nutrientenan. Mescos cu un mata un persona tambe mester di cuminda pa crece saludabel. Pero di kico mas nos muchanan tin mester?

Segun e piramid di Maslow e necesidadnan basico di un persona ta consisti di necesecidadnan fisico (cuminda, awa, calor, cariño y descanso) y di necesidadnan di seguridad (proteccion y personanan di confiansa). Tur hende mester di e necesidadnan basico pa por yega nan potencial maximo. Esaki ta inclui sera amistadnan, practica actividadnan, tin conocemento di bo mes y kico abo por, etc. (McLeod, 2018).

Si un mucha ta wordo neglisha di haya atencion, di haya respet, di tin seguridad, di calor y di amor, e mucha nunca lo florece na su potencial maximo. Nutricion ta un aspecto esencial den bida di un mucha, pero amor y cariño tambe ta importante. Otro aspectonan diario manera drumimento y higiena tambe ta necesario p’e desaroyo di un mucha. E mucha mester di esakinan p’e por sinti sigur. Un mucha mester structura y disciplina. Esaki tambe lo dun’e seguridad y confiansa. Disciplina no kiermeen straf nos muchanan of haci uzo di e “tik pedagogico” pa dun’e un ehempel. Duna structura y disciplina ta ora bo ta brinda e mucha cu instruccionnan pa mustra e mucha kico nos ta spera di dje. P.e. si nos kier p’e warda su co’i hunganan den cashi. Tambe ta importante pa pone limite na ora. Si acaso e mucha ta core rond den cas y si esaki no ta okay cu bo, bisa e mucha esaki tambe. “Den e cas aki nos ta cana”. No laga e hemchi yena full pa actua. Ser mayor ta nifica cu bo ta guia e mucha, y esaki ta un lifelong process. E trabou di un mayor no ta caba asina cu un mucha haci 18 aña. Nos ta mayor pa bida. Nos t’ey pa nos yiunan ora nan tin mester di nos y nos lo keda proteha nos yiunan, door di duna hopi amor, door di duna e mucha espacio pa explora (aunke esaki por duna nos miedo) y di haci eror (Becker, 2012).

Nos tur por contribui na e desaroyo y bienestar di nos muchanan door di ta mas envolvi. Stimula e mucha pa duna su opinion. Puntr’e kico e ta haya importante, puntr’e ken e lo ta aki 10 pa 15 aña, dunanan complimento ora nan haci un esfuerso. Disfruta cada momento cu nos tin cu nan, paso muchanan ta crece lihe y e ta un responsabilidad di nos tur pa gui’e durante e proceso aki.

Corda cu e cosnan chikito ta loke ta haci un impacto, manera duna nos muchanan un brasa por ehempel. Abo tabata sa cu un abraso por tin hopi beneficio pa un mucha?

Brasamento ta stimula e hormona oxytosina, cual ta e hormona di amor y felicidad. Ora oxytosina subi, hormonanan di crecemento tambe lo subi. Un abraso por stimula e crecemento di un mucha. Ora e nivel di oxytosina subi esaki lo mehora e sistema inmunologico di nos muchanan.

Ora bo brasa un much abo ta siñ’e con pa regula su emocionnan. Esaki ta importante paso ora un mucha ta chikito hopi biaha e no sa con pa haci esaki, specialmente si e no por papia ainda. Ora un mucha sinti emocionnan manera: rabia, disgusto, tristeza, decepcion, etc. y e no sa con pa expresa esaki cu palabra, e lo busca otro manera pa mustra nos con e ta sinti. E ta importante pa nos ta consciente di esaki. Dun’e un brasa pa bis’e cu bo t’ey pa protégé y asina bo lo siñ’e con pa calma su mes ora e tin mester. Ora nos brasa nos muchanan nos lo haci nan sinti feliz y esaki ta un rason mas pa brasa nos muchanan tur dia (Parenting, z.d.).

Pa mas informacion tocante e articulo aki yama Fundacion Respeta Mi na 582-4433.

Pa mas informacion tocante lantamento di nos muchanan yama Tienda di Educacion na 161 (gratis) of Fundacion Pa Nos Muchanan na 583-4247

Fuente

Becker, A. (2012). Inleiding in de pedagogiek. Van Gorcum: Assen

McLeod, S. (2018). Maslow’s Hierarchy of Needs. Busca ariba 15 di januari, di https://www.simplypsychology.org/maslow.html

Parenting for Brain. Why is hugging good for you? (z.d.). Busca ariba 16 di januari 2019, di https://www.parentingforbrain.com/children-hugging/