Fundacion Respeta Mi

TOCANTE NOS

Nos historia

Fundacion Respeta Mi a wordo funda ariba 10 di december na aña 1991. Den decada nobenta trahadonan social a señala cu tabata tin casonan di abuso sexual ta tumando luga ariba Aruba. Trahadonan social kier a contribui na prevencion di abuso sexual di mucha door di brinda informacion y trece conscientisacion na profesionalnan y comunidad di Aruba. Na prome instante Fundacion Respeta Mi tabata enfoca mas ariba prevencion di abuso sexual di menor. E prome nomber di nos organisacion tabata ‘Fundacion Contra Abuso Sexual di Menor Aruba.’ Na 2010 e nomber a cambia oficialmente pa ‘Fundacion Respeta Mi’.

Awendia nos organisacion ta enfoca ariba otro formanan di abuso di mucha. Por ehempel:

• Abuso fisico

• Abuso verbal & emocional

• Testigo di violencia domestico

• Negligencia di mucha

Meta

Contribui na pravencion di abuso di mucha na Aruba

Cuida interes general di victimanan di abuso di mucha na Aruba

Contribui na prevencion di abuso di mucha na Aruba door di brinda informacion y percepcion nobo continuamente na tur cu ta involucra ariba tereno di abuso di mucha, incluyendo publico general. Pa asina promove e calidad y mehoracion di actividadnan ariba tereno di prevencion di abuso di mucha continuamente.

Fundacion Respeta Mi ta un organisacion profesional cu e meta pa tin suficiente personal profesional y educa disponibel.
Fundacion Respeta Mi ademas a formula un plan di maneho y ta implementando esaki pa sigura cu su mesun miembronan, personal profesionalnan den e ramo di prevencion di abuso di mucha continuamente ta wordo educa y ricibi training. Esaki mester conduci na mehoracion di cooperacion bou di diferente instancia na Aruba y cu ta wordo traha ariba formulacion di un plan integral ariba tereno di abuso di mucha.
E publico general tambe ta wordo continuamente informa y conscientisa tocante kico ta abuso di mucha y e necesidad pa prevencion di abuso di mucha y e posibel alternativanan.

Fundacion Respeta Mi ta dirigi ariba prevencion primario.
Esaki kiermen cu mas atencion ta wordo pone na duna informacion y educacion dirigi na e comunidad general. Tambe na e educacion continuo na profesionalnan cu ta traha den sector social, educacional, juridico y medico.

Profesionalnan cu ta traha cu mucha mester ta alerta pa señalnan di abuso di mucha. Señalnan di abuso di mucha tin ora por ta dificil pa reconoce. No ta tur señal bo por reconoce na e curpa di e mucha. E ta importante pa ta consciente cu nos por reconoce señalnan di abuso di mucha den e comportacion di mucha tambe. Muchanan cu ta pasa den abuso no tur ora ta acerca un persona di confiansa pa cont’e loke ta pasando. Esaki sigur ta mas dificil pa muchanan chikito cu ainda no tin e habilidad pa papia y pa indica cu nan ta experenciando abuso na cas. Muchanan cu ta wordo abusa door di nan mesun mayornan por hay’e dificil pa conta un persona tocante e abuso. Esaki ta pa motibo cu muchanan ta leal na nan mayornan. Mester tene cuenta tambe cu muchanan no tur ora ta consciente cu nan ta pasando den abuso. E sa pasa cu muchanan por tin berguensa y miedo tambe di conta di e abuso cu nan ta pasando aden y/of e situacion na cas.

‘Abuso di mucha’ no por wordo conclui a base di un señal. Na momento cu reconoce un señal di abuso di mucha, lo mester analisa e situacion y anda cu cautela cu e sospechonan cu bo tin. Reconoce señalnan di abuso di mucha ta trata di: sa & sinti, di conocemento & intuicion. Señalnan di mucha semper mester wordo comunica sea na e mayornan mes, coleganan y/of na instancianan concerni.

E tabel ariba e siguiente pagina, ta fungi como un herment pa yuda reconoce señalnan di abuso di mucha. Abuso di mucha no por wordo constata, ni proba cu e herment aki, pasobra loke bo señala no tur ora ta un indicacion inmediato cu abuso di mucha ta tumando luga. E chens cu abuso di mucha ta tumando luga, ta mas grandi si tin varios señalnan cu por wordo reconoci cerca un mucha.

Atencion! E lista aki ta trata di señalnan di abuso di mucha & negligencia di mucha en general. No ta wordo dirigi ariba un forma di abuso di mucha, cu excepcion di abuso sexual di mucha.

Pa conseho tocante abuso di mucha of pa haci un melding oficial, tuma contacto cu Bureau Sostenemi na 588-1010

Si tin pregunta tocante e señalnan di abuso di mucha of si ta desea di ricibi e workshop ‘Con pa Reconoce Señalnan di Abuso di Mucha’, por tuma contacto cu Fundacion Respeta Mi na 582-4433

Nos team

Fundacion Respeta Mi ta consisti di dos trahado dinamico cu ta studia ariba tereno social. Nos team tin pasion pa nan trabou pa loke ta trata prevencion di abuso di mucha. E team di Fundacion Respeta Mi tambe ta consisti di miembronan di directiva cu ta traha boluntariamente pa nos organisacion, incluyendo un presidente, un tesorero y un secretaria.

Abo ta desea di bira un boluntario of haci bo pasantia cerca nos? Con nos ta aporta na prevencion di abuso di mucha?

• Duna presentacion na scolnan

• Ofrece workshop di topiconan di abuso di mucha

• Duna training na profesionalnan cu ta traha cu mucha

• Brinda informacion na mayornan/ educadonan y comunidad

Ken ta nos grupo meta?

Segun tratado internacional di derecho di mucha, un persona ta un mucha te cu 18 aña. P’esey Fundacion Respeta Mi tin como grupo meta muchanan (0-18 aña), pero nos ta brinda informacion na comunidad henter. Nos ta duna informacion na profesionalnan, mayornan/ cuidado/ educado y mas cu claro nos muchanan.