Stress…ki Efecto Esaki tin Ariba bo Habilidadnan como Mayor?
Tur hende sa experiencia stress de bes en cuando, kico ta pasa ora mayornan ta experiencia esaki cu hopi frecuencia? Den e articulo aki nos lo splica mas di esaki.
E manera cu mayornan ta interpreta e comportacion di nan yiu por ta un risico pa abuso di mucha. Segun Marieke Beckerman di Universidad di Leiden stress por hunga un risico riba abuso di mucha. Ora un mayor tin stress, esaki lo por tin un efecto ariba e manera cu e ta interpreta y evalua e comportacion di su yiu. Esaki kiermeen cu mayornan cu stress lo wak e comportacion di nan yiu di un otro manera, compara cu mayornan cu no tin stress of cu ta experienciando menos stress. Hopi biaha mayornan cu ta experiencia stress lo wak e comportacion di nan yiu di un manera negativo. Stress tin un impacto riba e situacion na cas diariamente. Ora un mayor no ta emocionalmente disponibel esaki lo por trece mas stress serca e mayor. Esaki ta pa motibo cu e mayor no por duna su yiu atencion positivo, pone regla y splica su yiu cua ta e comportacionnan cu si e lo kier wak di dje.
Mayornan cu ta experiencia stress hopi biaha lo wak e comportacion di e mucha na un manera negativo y no lo tene cuenta cu e edad di e mucha of simplemente cu tin ora accident ta pasa, entre otro ora e mucha laga su beker di juice basha, ora e mucha trompica of ora e mucha susha e bril di WC. Si e mayor pa motibo di stress no ta capas di wak cu tin ora e comportacion di e mucha no necesariamente ta e mucha su fout, esaki lo hunga un risico cu e problema lo por escala.
Ora un mucha ta pasa door di trauma, pa medio di abuso, esaki por tin consecuencia riba termino corto y termino largo. E consecuencianan aki por ta ariba e aspecto fisico y emocional. Ta importante pa sa e causa di e trauma cu e mucha a experiencia of ta experenciando ainda. Di e forma aki e factornan cu ta hunga un rol riba trauma di mucha por wordo limita, como cu ya bosa caba kico e mayornan of cuidadornan tin mester pa bay om miho cu un mucha, door di uza atributonan positivo. Akibou bo por lesa algun tips di kico pa haci si bo ta experiencia stress.
Tips:
1. Ora bo ta sinti stress y bo ta ripara cu yiu no ta haci’bo caso tuma un break. Duna bo mes un time-out di 5 minuut. Ta importante pa ta consciente di loke abo ta sintiendo na e momento ey. Hala rosea profundo…y despues bay bek serca e mucha (ora cu bo ta sinti cu bo ta cla) pa papia cu’ne.
2. Uza e sistema di stoplicht pa mustra bo yiu cu bo mester di un pauze. Bisa bo yiu cu awo bo ta sinti cora y bo mester un descanso. Esaki ta un bon manera pa duna’bo un tempo pa regula bo emocionnan, pa pensa miho kico abo como mayor ta bay haci pa cambia e situacion.
3. Bisa bo yiu cua comportacion bo ta desea di wak, embes di cua comportacion bo no kier wak. Duna bo yiu instrucionnan duidelijk. Por ehempel: “Kita bo uniform di scol y pon’e den e baki di paña sushi.” Sea realistico na e parti aki, paso no ta tur mucha por haci tur cos ainda. Sea consciente di e mucha su edad y su habilidadnan
4. Ta mas consiente di kico tin tras di e comportacion di bo yiu. E mucha kisas ta gewoon cansa of e tin hamber. Y e mucha porta ta susha su paña paso e sa cu e ora e lo haya zundra, y atencion ta loke e ta buscando for di su mayor of cuidador.
5. Ora bo tin un relacion cu ta consisti di amor y cariño e ta mas facil pa un mayor pa combersa cu su yiu. Asina mayor y yiu lo por compronde otro miho tambe. Esaki tambe ta conta pa cuidadornan y lidernan.
6. Pone bo limite na ora! Bisa e mucha kico bo ta verwacht di dje. Si e mucha ta pasa e liña e ora mester hala su atencion of dun’e un alternativa. Corda cu semper un premio ta traha miho cu un straf, p’esey ta importante pa premia e mucha ora e haci algo bon. Na e manera aki e lo bira mas duidelijk p’e mucha cu paso el a haci tal cos of paso el a comporta di tal manera ta e motibo pakico e ta wordo premia. Corda haci’e duidelijk pakico e ta haya e premio. Por ehempel: “Bo a piki e cos di hunganan benta abou den bo camber, p’esey mi ta duna’bo e cuki aki.” Y corda cu premio no necesariamente kiermen cosnan materialistico. E por ta un brasa, un high-five, hunga wega hunto of bo ta gewoon bis’e kico abo ta haya cu el a haci bon. Dunando bo yiu un premio ora cu e comporta su mes bon lo duna’bo hopi fruta riba termino largo. Be patient parents! 😊
Si bo kier sa mas informacion tocante trauma y abuso di mucha yama Fundacion Respeta Mi libremente na 582-4433. Nos ta disponibel di dialuna pa diabierna di 8or pa 5or.
Si bo kier mas guia y sosten den e lantamento y educacion di bo yiu yama:
Tienda di Educacion na 161
Fundacion pa nos Muchanan na 583-4247 of 588-0856
Fuente:
Becker, A. (2012). Inleiding in de pedagogiek. Van Gorcum: Assen
Universiteit Leiden. (2018). Stout of onhandig? Negatieve attributies van ouders in relatie tot het risico op kindermishandeling. Busca riba 1 di oktober 2018, di https://www.universiteitleiden.nl/nieuws/2018/09/promotie-marieke-beckerman-naughty-or-clumsy
Kind & Gezin. (z.d.). Straffen en belonen: waar gaat het over? Busca riba 1 di oktober 2018, di
Ouders van nu. (z.d.). Werkt straffen en belonen? Busca riba 1 di oktober 2018, di https://www.oudersvannu.nl/peuter/opvoeden/werkt-straffen-en-belonen/
