Nos tur a yega di tene un secreto. Tin diferente tipo di secreto y e ta importante pa nos como adulto siña nos muchanan cu no ta tur secreto mester keda scondi.

Mayoria adulto no tin mal intencion ora nan ta pidi un mucha pa tene un secreto, pero e ta importante pa ta consciente cu tin adulto cu mal intencion cu si lo manipula un mucha pa tene secreto, manera mishimento inapropia of abuso sexual.

Con pa siña nos muchanan tocante diferente tipo di secreto?

Secretonan leuk y pret:

· Tin ora nos kier duna un hende un sorpresa. Nos lo bisa: “Corda no bay bisa papi cu nos ta bay haci un fiesta p’e, esaki ta un secreto”.

· Tin ora nos kier regala un hende algo. Nos lo bisa: “Corda no bisa oma kico nos a cumpra p’e, lag’e keda un sorpresa.”

· Tin hopi otro ehempel mas, pero secretonan leuk y pret ta trata di duna un hende un sorpresa y haci un persona contento.

Secretonan cu por perhudica un mucha:

· Tin ora nos por pidi un mucha pa tene un secreto, pero no cu mal intencion. Por ehempel: “Corda no bisa mami cu papi cu opa a laga bo drumi laat ayera. Tabata weekend y e pelicula tabata pret toch?”

· Otro ehempel: “Bo ta mi miho amigo, tuma e mangel aki, pero no bisa juffrouw cu ta ami a duna bo e.”

· Secretonan cu por perjudica un mucha, no ta secretonan cu bo lo wak peliger di biaha. E fastioso di e tipo di secretonan aki ta cu nos ta duna nos muchanan e mensahe cu nan no mag di bisa “e berdad” ora nan haci algo cu ta NO “okay” of cu NO ta social aceptabel. E ora loke nos ta haciendo ta: dunando nos muchanan e mensahe cu nan lo haya problema si nan papia e berdad. Nos kier e contrario, nos kier pa nos muchanan tin e curashi pa bin dilanti cu algo cu ta molestia nan, pa con grave cu e por ta. Si di chikito nos ta crea miedo den nos muchanan, nan lo hay’e dificil pa aserca nos pa ayudo, pasobra nan ta pensa cu nan lo haya zundra, cu nan no lo wordo scucha of te hasta haya sota (straf fisico).

Secretonan peligroso:

· Abusadornan ta depende di e mucha pa wanta e secreto. E abusador no kier pa niun hende sa di e abuso. Esaki por tin diferente motibo, por ehempel: e abusador kier pa e abuso sigui of e abusador no kier pa su imagen of reputacion wordo mancha. Abo tabata sa cu e profiel di un abusador no ta cuadra den un demografico stereotipico, esaki kiermeen cu e caracteristicanan di un abusador ta hopi varia. NO tin un profiel di un abusador. Un cos cu si ta cuadra mayoria biaha ta cu: e abusador aki ta un hende hopi respeta y di confiansa cerca e famia cu ta confia e mucha (victima) cun’e. Ban pone asina: e abusador lo ta e persona cu menos abo ta kere, paso abo tin asina un respet p’e y pasobra bo ta encanta cu e persona aki (TMBE, n.d.).

· Abusadornan lo bisa: “Corda no conta niun hende loke nos a haci, esaki ta nos wega secreto.” Tambe un mucha por wordo manipula: “Si bo bisa un hende, bo ta bay haya problema. Bo lo haya straf. Tur hende ta bay haya sa kico abo a haci.” Un mucha por te asta wordo menasa: “Si bo mester tribi di conta un hende bo ta wak kico ta bay pasa cu bo.”

· Muchanan cu no a wordo educa tocante secreto, mayoria biaha lo no bisa nada na niun hende, pasobra e mucha inocente no sa e diferencia entre secreto bon y secreto malo (Morin, 2018).

Con pa papia cu bo yiu tocante secretonan?

· Papia regularmente tocante secretonan “bon” y secretonan “malo”. E combersacion aki nos por cuminsa tene cu nos muchanan di chikito caba. Haci esaki un combersacion regular, mientras e mucha ta bay desaroyando e lo compronde e topico miho. E mucha lo compronde cu tin ora un hende lo pidi pa tene un secreto cu intencionnan cu no ta bon y cu e lo mester confia un adulto si esaki pasa . Tip: por haci e combersacion aki na un manera speels, rollenspel semper ta un bon metodo. Corda cu e meta no ta pa spanta nos muchanan. E meta ta pa haci nos muchanan mas consciente tocante e secreto “bon” y secreto “malo”.

· Papia regularmente tocante mishimento inapropia. E mucha mester sa cu e ta den tur su derecho pa nenga un brasa of un sunchi, apesar cu e persona aki kier djis mustra cariño na e mucha. E mucha mester sa cu su curpa ta di dje, e tin control di esaki. E mucha mester sa cu lo tin circunstancia, por ehempel si e mucha ta malo, un dokter lo por samina su vagina (mucha muhe), penis (mucha homber), anus, pecho of lombrishi. E mucha mester sa cu bou niun otro circunstancia e partinan menciona mag di wordo mishi. Atrobe por uza e tip cu nos a menciona akiriba.

· Uza sorpresa, enbes di secreto. Por ehempel: “Mañan mainta nos ta bay traha un dushi desayuno pa mami. Nos ta bay tene esaki como un sorpresa?”

· Papia tocante adultonan di confiansa: nos muchanan mester sa ken nan por aserca si nan tin algun preocupacion. Nos muchanan mester wordo asegura cu nan por confia nos.

· Percura pa nos muchanan sa cu nan no lo haya straf pa bisa algo cu ta molestianan. Splica e mucha cu ni con grave e problema (secreto) ta, nos lo NO rabia. Bis’e: “Nos t’ey pa apoya bo!”

Secrecia vs. privacidad

Nos a lesa cu e no ta bon pa stimula tenemento di cierto tipo di secreto bou di nos muchanan y hobennan. Toch e ta importante pa splica nos muchanan e diferencia entre tene secreto y asuntonan priva. Por ehempel: sin tin un miembro di famia cu ta bay divorcia, si tin un miembro di famia cu ta den problema financiero, si un persona of otro mucha ta cambiando paña, etc. Mientras un mucha ta bay creciendo e lo cuminsa atende cu asuntonan priva mas miho. Tin algun asunto cu mester keda priva, pa asina mustra respet. E palabra respet ta un palabra masha importante y cu mester wordo stimula di chikito den nos muchanan (Morin, 2018).

Fuente:

Morin, A. (2018). Why Parents Shouldn’t Tell Kids to Keep Secrets. Busca ariba 22 di mei 2019, di https://www.verywellfamily.com/why-you-shouldnt-tell-your-child-to-keep-secrets-3880039

The Mama Bear Effect. (n.d.). Prioritizing Child Safety. Busca ariba 22 di mei 2019, di https://themamabeareffect.org/prevent/prioritizing-child-safety/