Pasco…e temporada di paz, amor y stress
Nos a yega den e ultimo luna di aña 2018. Asina cu fin di aña yega nos por cuminsa sinti nos mes druk y presiona. Tin ora nos lo ta asina ocupa cu nos no ta ni para keto na loke cu nos ta sinti na e momento ey. E celebracion di fin di aña ta algo hopi personal. No tur famia lo haci esaki na e mesun manera. Tur famia tin nan mesun tradicion y custumber. Pero toch hopi famia por relaciona algo cu otro. Algo cu tur hende lo cuminsa sinti, mayoria biaha inconscientemente, ora nan ta bou di hopi presion di algo. Y esaki mas cu claro ta stress. Presion durante temporada di fin di aña por te asta duna nos un sentimiento di tristesa. Si, sinti tristo durante dianan di fiesta ta un sentimieto comun. E causa mas grandi di esaki ta cu nos ta pone expectativanan cu no ta realistico pa nos mes (UHN, 2017). Nos no mester tene berguensa di comunica esaki cu nos sernan keri. Door di comunica esaki nos sernan keri lo por sostene nos y duna nos apoyo. Mescos cu stress, bisa bo miembronan di famia y amistadnan cu bo ta sintiendo stress. Durf di pidi pa ayudo si ta necesario serca nan.
Den luna di december Fundacion Respeta Mi kier enfoca ariba e periodo aki cu por causa stress familiar. Den nos articulo anterior tocante stress por lesa mas di e efecto di stress ariba e lantamento di un mucha. Paso stress sigur cu si tin un influencia ariba e manera cu nos lo aserca nos muchanan. Porta nos lo zundra, grita y rabia mas of porta nos lo duna nos muchanan menos atencion. Si un famia ta bou di stress e lo no por funciona optimal. Ta importante pa realisa esaki. Vooral den dianan di fiesta e pression ta halto pa casnan ta nechi drecha, pa tin cuminda na abundancia, pa bisti y luci bunita…pero esaki ta loke realmente ta importante durante temporada di fin di aña?
Awel esaki ta depende di e norma y balor di cada persona. Tin hende ta duna hopi balor na regalo. Of tin hende simplemente ta aprecia regalo. Muchanan hopi biaha lo bira contento ora nan haya un co’i hunga nobo. Y co’i hunga ta importante p’e desaroyo di nos muchanan, pero esaki ta mas importante cu interaccion entre mucha y mayor, cuidador of educador? Co’i hunga ta algo pasahero, pero charlanan cu bo tene cu un mucha lo por keda graba pa semper den mente di un mucha. Naturalmente esaki ta depende di e edad di e mucha tambe. Un mucha di 3 aña no ta bay keda corda un combersacion compleho y filosofico. Pero interaccion ta importante y necesario di baby caba. Atencion ta importante pa e mucha por desaroya, vooral si e ta haya esaki for di personanan cu e stima y confia. Asina ta…no neglisha e momentonan bunita durante fin di aña. Ban probecha y haci cosnan leuk cu nos muchanan, cosnan cu nan lo keda corda y ta gradecido na nan pa semper. Ban stima y cuida nos muchanan tur dia di aña!
Si bo tin pregunta tocante e articulo aki of ta desea di sa mas tocante negligencia di mucha yama Fundacion Respeta Mi libremente na 582-4433
Si bo kier haya mas conseho di con pa comunica cu muchanan yama Tienda di Educacion na 161 (gratis) y Fundacion Pa Nos Muchanan na 583-4247
Fuente:
University Health News. (2017). Why Do Some People Experience Depression During the Holidays? Busca ariba 4 di December, di https://universityhealthnews.com/daily/depression/do-your-depression-symptoms-worsen-during-the-holidays/
