Responsabilidad di mayor

Como mayor y cuidado nos tin un responsabilidad grandi pa loke ta trata e seguridad y bienestar di nos muchanan. Como cuidado primario nos por nifica y contribui na e lantamento sano di nos muchanan. Kico ta abuso di mucha?

Si tin pregunta tocante e señalnan di abuso di mucha of si ta desea di ricibi e workshop ‘Con pa Reconoce Señalnan di Abuso di Mucha’, por tuma contacto cu Fundacion Respeta Mi na 582-4433

Señalnan Fisico

Tur daño y maltrato cu ta wordo haci na e curpa di un mucha (suta, scop, morde, ranca cabey, etc.).

Castigo corporal tambe ta un forma di abuso di mucha?
Apesar cu ainda “sota of klap” ta wordo uza como un metodo pa disciplina un mucha, esaki no ta e manera mas efectivo pa educa un mucha. Diferente estudionan scientifico a comproba cu ‘castigo corporal’ tin poco beneficio pa e mucha su educacion. Ademas ‘castigo corporal’ tin poco efectividad, den sentido cu e lo funciona solamente ariba termino corto. Ariba termino largo ‘castigo corporal’ den forma di ‘sota’, ‘klap’, etc. no lo siña e mucha e diferencia entre ‘bon’ y ‘malo’.

Tur daño y maltrato cu ta wordo haci na un mucha pa medio di palabra (yama mucha pa nomber, menasa, tenta, critica, rechasa, etc.).
Tin ora nos no ta realisa cu nos palabranan por haci nos muchanan daño. Abuso verbal/ emocional ta afecta un mucha psicologicamente. Na prome instante kisas nos no ta mira efecto, pero abuso verbal/ emocional tin consecuencia pa e mucha su autoestima y confiansa propio. Muchanan cu ta experencia abuso verbal/ emocional lo por tin menos durf di haci fout, menos durf pa explora, y menos durf pa crece.

Tur forma di actividadnan sexual y mishimento inapropia cu un mucha no por duna permiso pa haci (rape, mishi cu parti intimo, obliga pa wak pornografia, manda mensahe of potret inapropia, etc.) ta cay bou di abuso sexual di mucha. Como mayor y cuidado nos ta responsabel pa duna nos muchanan informacion tocante nan curpa, entre otro e nomber corecto di nan parti intimo. Mayor y educadonan ta e adultonan di confiansa di nos muchanan. E ta importante cu nos muchanan sa cu nan por acerca nos ora nan ta sinti tristo, rabia, miedo, etc.

Cas ta caminda un mucha ta crece y desaroya. Pero kico ta pasa ora cu un cas no ta sigur pa un mucha biba aden? Kico ta pasa na momento cu violencia ta tuma luga den un hogar? Un mucha ta bira testigo di violencia domestico ora cu e ta wak , scucha y sinti violencia na cas.

Ora un mayor of cuidado ta faya pa cumpli cu e necesidadnan fisico y emocional di un mucha (no ta duna suficiente cuminda, no ta tira bista ariba e mucha, mucha no ta wordo hiba dokter ora cu e ta malo, mayornan/ cuidadonan ta uza alcohol y droga cerca di e mucha, mucha no ta wordo apoya, mucha no ta haya amor, etc.)