Fundacion Respeta Mi cada aña ta enfoca ariba un tema nobo pa conscientisa e pueblo di Aruba tocante e diferente formanan di abuso di mucha. Den luna di november Fundacion Respeta Mi lo enfoca ariba nos tema annual, cual ta abuso sexual di mucha homber. Un comunidad bon informa tambe por contribui na nos mision pa preveni abuso di mucha.

Ora di papia tocante abuso sexual hopi biaha ta wordo pensa ariba mucha muhe, y esaki no ta nada raro como cu e tipo di abuso aki ta pasa generalmente mas hopi bou di mucha muhenan, esaki ta wordo indica bou di e cifranan di Bureau Sostenemi te cu aña 2017. E hecho ta cu abuso sexual di mucha homber ta mustra di ta generalmente menos, como cu no ta papia hopi di dje cu consecuencia cu e categoria aki varios biaha ta wordo lubida. E tema di abuso di mucha ta un tema controversial. E tema di abuso sexual di mucha homber den un sociedad ‘machista’ ta wordo experiencia como mas controversial ainda. Un mucha homber cu trata na expresa su emocion a base di un experiencia negativo ta wordo stigmatisa como vulnerabel. Un caracteristica negativo p’e ser masculino (Aasas, n.d.). E ta importante pa duna mucha hombernan un bos y duna nan e sosten cu nan tin derecho ariba dje ora nan bin dilanti cu nan experiencia di abuso.

Mucha hombernan hopi biaha ta opta pa no revela nan experiencia cu abuso sexual y nan lo tin dificultad pa te asta conta personan di confiansa. Hopi biaha mucha hombernan tin miedo cu hende lo no kere nan. Ademas nan tin miedo di wordo ridiculisa of di wordo acusa di ta un persona debil. Mucha hombernan cu a pasa den e tipo di abuso aki hopi biaha tin miedo di wordo percibi como un persona homosexual. E parti mas fastioso ta ora mucha hombernan cu a bira victima di abuso sexual wordo culpa di no ta ‘homber’ suficiente pa proteha nan mes (Aasas, z.d.).

E ta un tarea di nos tur pa salvaguardia e bienestar di nos muchanan. E luna aki Fundacion Respeta Mi kier brinda e comunidad di Aruba, especialmente mayornan, educadornan y tur personanan cu tin e seguridad y bienestar di tur mucha na pecho, informacion y conseho tocante e tema delicado aki.

Pa kibra e ‘taboo’ di abuso sexual di mucha homber nos mester stimula otro pa cuminsa papia mas tocante e tema y laga stereotiponan un banda. Stereotiponan ta ideanan y creencianan generalisa over di un categoria of personanan. E ta hancra den nos cultura pa spera cierto comportacion ‘masculino’ di nos mucha hombernan. Pero si nos por pone esaki un banda y laga e standarisacion cu mucha hombernan mester bisti blauw y hunga cu truck los y enfoca riba loke e mucha mester di nos na e momento ey, nos lo por crea un laso di confiansa, y esaki ta un componente importante pa un mucha ora e pasa den cosnan fastioso. Akibou por lesa algun tips pa yuda kibra e barera aki, y kere’mi cu e no ta bay ta facil. Ta consehabel pa tuma tempo y busca sosten si ta necesario.

1. Crea un espacio sigur pa asina e mucha por aserca bo como mayor. Esaki por ta pa cualkier cos y e no mester ta necesariamente un problema. Un mucha mester por tin un persona serca ken e ta sinti’e sigur pa conbersa over di su dia, over di cosnan cu ta preocup’e of juist cosnan cu ta haci’e feliz. Ta importante pa duna e mucha tempo pa papia y no spera cu e mucha lo conta tur cos di biaha. E mucha no mester sinti su mes husga. Bisa e mucha cu ta okay pa aserca cu adulto di confiansa cu su pensamentonan y su emocionnan.

2. Mucha hombernan tambe ta un persona y nan tambe ta sinti emocionnan cu no necesariamente ta ‘masculino’. Como mayor y educador e ta importante pa asegura cu mucha homber cu e ta okay pa sinti tristo, insigur, miedo, confundi, sensitivo, emociona y contento. Bisa e mucha cu e ta normal pa mucha hombernan tambe sinti e emocionnan y cu e ta normal pa expresa nan mes tambe.

3. E ta importante pa ta consciente cu si e mucha homber desvia di e normanan cu e mester comporta di un manera ‘macho’, cu esaki por wordo mira como algo straño pa otro hende cu no ta custuma ainda di wak esaki, como cu e no ta socialmente aceptabel. P.e. si un mucha homber ta tristo paso su cos di hunga a kibra y e ta expresa esaki abiertamente e lo por haya reaccion negativo di otro hende. E ora ey ta importante cu e mayor of educador ta aserca e mucha y bis’e cu e ta haci bon di bisa kico e ta sinti y alabes dun’e sosten. E tin cu bira okay pa mucha hombernan expresa nan mes y papia tocante nan emocionnan, mayornan y educadornan por hunga un rol importante den e proceso aki door di brinda apoyo. Bisa e mucha cu e no mester tin miedo pa ta su mes.

4. Yuda bo yiu pa compronde situacionnan di otro hende, siñ’e p’e ta un persona cu comprension y tolerancia. Esakinan ta palabranan grandi, pero si bo djis combersa cu bo yiu, puntr’e di su pensamentonan y kico e lo haci den tal situacion, ya bo lo ta bezig ta pratica e habilidadnan ey cu e mucha y ta siñando e con pa resolve conflictonan. Esaki por wordo haci di un manera speels pa medio di rollenspel. Bisa bo yiu cu ta importante pa tin comprension pa otro.

5. Papia habri cu e mucha di chikito caba tocante sex. Esaki no kiermen papia explicitamente tocante sex y con e proceso ta, pero siñ’e di chikito caba unda su partinan priva ta. E ta importante pa siña muchanan cu hende no mag di mishi eynan y cu nan vagina, penis, chanchan, anus of pecho ta di nan so. Papia di sex ta pa educa e mucha, no pa stimul’e pa bay haci e acto. Mayornan y educadornan mester ta consciente cu informacion tocante di sex ta necesario p’e mucha su desaroyo y no mester warda necesariamente p’e mucha yega pubertad pa haci esaki. Muchanan tin derecho ariba proteccion y muchanan tin derecho ariba informacion. Aunke sex ta dificil pa papia di dje toch e mucha mester di esaki pa su desaroyo. Bisa bo yiu cu e ta normal pa papia di sex y pa tin pregunta over di esaki.

Si bo tin algun pregunta of bo ta desea di sa mas tocante e tema di abuso sexual di mucha homber yama Fundacion Respeta Mi libremente na 582-4433

Si bo kier haya mas guia di con pa comunica cu bo yiu yama Tienda di Educacion na 161 (gratis).

Fuente

Association of Alberta Sexual Assault Services. (n.d.). Men and Sexual Assault. Busca ariba 30 di oktober, di https://aasas.ca/support-and-information/men-and-sexual-assault/

Reiner, A. (2018). Boy Talk: Breaking Masculine Stereotypes. Busca ariba 30 di oktober, di https://www.nytimes.com/2018/10/24/well/family/boy-talk-breaking-masculine-stereotypes.html

Shame Proof Parenting. (n.d.). Make it Safe. 5 ways to create a safe space in your home. Busca ariba 31 di oktober, di https://shameproofparenting.com/make-it-safe-5-ways-to-create-a-safe-space-in-your-home/