Kico ta ‘cyberstalking’?

‘Cyberstalking’, tambe conoci na Papiamento como acoso cibernetico ta e uzo constante di tecnologia (social media, mail, sms, etc.) pa contacta y acosa un persona, causando nan miedo pa nan seguridad. ‘Cyberstalking’ ta un invasion di privacidad y por tin consecuencia pa e bienestar emocional di e persona cu ta experenciando esaki. ‘Cyberstalking’ ta un forma di acoso digital. Acosadonan cibernetico ta wordo motiva door di nan deseo pa eherce control di un persona. Tanto mucha muhe como mucha homber por bira victima di acoso cibernetico.

Door cu ta facil pa keda anonimo online, e por bira dificil tin ora pa identifica e persona cu ta causando ‘cyberstalking’, pero mayoria biaha ta trata di un persona conoci (compañero di klas, amigo, ex pareha).

Tacticanan di un ‘cyberstalker’:

• Tin diferente manera creativo pa acerca victima
• Ta haci uzo di menasa
• Ta ‘blackmail’ of haci ‘sextortion’
• Sigui victima ariba diferente plataforma (Facebook, IG, Twitter, Tiktok, Discord, Roblox, etc.)
• Crea ‘fake accounts’ (pa proteha nan identidad)
• Manda mensahe y laga comentario (vulgar/ inapropia) constantemente
• Hack account pa leak informacion personal (doxing)
• Catfishing (pretende di ta otro hende)
• Distribui potret/ video, di berdad y falso (deepfakes) di e victima
• Manda potret explicito di nan mes (p.e. potret sunu/ dickpics)
• Manda regalonan indesea (tanto fisicamente, pero digital tambe den forma di un giftcard)

Hobennan cu ta experenciando ‘cyberstalking’ ta pensa cu nan mes por resolve e situacion of nan por tin berguensa pa papia cu un persona tocante loke ta pasando. P’esey ta importante pa nos tambe ta alerta pa e posibel señalnan di ‘cyberstalking’.

Señalnan di ‘cyberstalking’:

• Ta pasa mas tempo online cu normal y ta prefera haci esaki priva, p.e. door di bay den otro camber
• E hoben ta haya yamada, mensahe, mail, etc. den oranan straño
• E hoben ta actua sospechoso ora cu nan ta online
• E hoben ta haya regalo di hende cu abo no conoce
• Nan ta mustra spanta, ta yora of mustra manera algo ta molestia nan, durante of despues cu nan ta online

Con pa preveni ‘cyberstalking’?

• Activa privacy settings ariba e plataformanan social cu nan ta uza (esaki ta diferente pa cada plataforma)
• Informacion personal (adres, number di telefon, location, etc.) ta priva y no mester comparti esaki
• Corda log out semper di cada cuenta y nunca laga telefon tira caminda otro hende por uz’e (p.e. durante pauze, den klas, ora di deporte, etc.)
• Importante ta pa mayornan tambe realisa cu nan tambe por share informacion priva (inconscientemente) di nan yiu, cu por haci e mucha mas vulnerabel
• Ta consciente tocante loke ta post online. Pensa prome cu post. Mescos ta conta pa mayornan cu mester modela comportacion saludabel encuanto actividadnan online
• Corda cu bo yiu por bira victima, pero e por ta e causante tambe. Papia cu nan tocante privacidad, respet y consentimento

Mi yiu ta victima di ‘cyberstalking’… kico mi haci?

‘Cyberstalking’ ta dificil como cu tin ora e por trata di un persona cu bo yiu ta wak tur dia, p.e. na scol. Como mayor bo por sinti desespera pa yuda bo yiu. Akibou nos ta menciona algun tips di kico pa haci:

1. Comunica y tene poco interaccion cu e ‘cyberstalker’. Pone limite na comienso y laga sa cu bo no ta haya bon loke e ta haciendo, pero no keda papia cu ne como cu esaki por duna e ‘cyberstalker’ mas forsa pa sigui
2. Block e persona cu ta causando molester y raporta e persona ariba e plataforma cu bo yiu ta uza
3. Warda tur prueba cu por logra colecta. Esaki por ta dificil, pasobra bo instincto lo desea pa bo deshaci di tur e cosnan cu ta haciendo bo yiu dolor, pero warda cualkier mensahe, voicenote, video, call y/of chat logs, e-mail, username/ nickname, links, etc. c
4. Bay polis cu tur e materialnan di prueba cu bo tin y haci un denuncia
5. Busca guia professional pa e mucha, como cu el a experencia stress emocional cu por a afecta su salud mental

Como cu acoso cibernetico ta algo cu ta sosode online y no fisicamente, tin ora por tin e pensamento robes cu ‘cyberstalking’ ta menos peligroso compara ora cu un persona ta pasa den acoso fisico. Ta berdad cu acoso fisico tin ora por escala pa violencia fisico, pero violencia emocional tambe ta haci daño. Como cu uzo di internet ta un parti integral di nos bida personal y profesional, acosadonan cibernetico por probecha di esaki y manda cosnan priva of haci cosnan online cu lo por tin consecuencia pa e victima (un otro rason pa ta empatico cu otro, brinda apoyo y no husga ni bergonsa niun hende bou di niun circunstancia!).

Awe ta #SaferInternetDay y nos a scoge e aña aki pa e topico di ‘cyberstalking’ pa conscientisa mayornan di e problematica aki. Pa cualkier pregunta di e articulo of di e topico por tuma contacto cu Fundacion Respeta Mi na 588-4433 of 564-0270

Fuente

Gordon, S. (2021). What You and Your Teen Need to Know About Cyberstalking. https://www.verywellfamily.com/cyberstalking-how-to-keep-your-teen-safe-5181308