Grooming, un palabra na Ingles cu diferente nificacion, pero kico ta ‘grooming’ di menor? Nos a trece e tema di ‘grooming’ algun siman atras dilanti. ‘Grooming’ ta un subtema di abuso sexual, no ta tur victima di abuso sexual ta pasa den e proceso di ‘grooming’. Awe nos kier a duna boso mas conocemento tocante e tema y e señalnan di ‘grooming’. Ora nos ta papia di abuso sexual no necesariamente nos kiermen abuso sexual cu penetracion, como cu tin diferente forma di abuso sexual, sigui lesa abou pa mas informacion.

‘Grooming’ ta ora un persona ta crea un “relacion special” of conexion emocional cu un menor. E kier haya e menor su confiansa, cu e intencion pa haci actonan sexual cu e menor. Den e articulo aki nos lo uza menor, pa asina e ta mas cu claro cu tanto mucha como hoben por pasa den e proceso di ‘grooming’. E ta importante pa sa cu ‘grooming’ por pasa cu cualkier menor, di cualkier edad, sexo, nacionalidad y clase social (NSPCC, n.d.). E chens pa bira victima di ‘grooming’ ta mas grandi pa menornan entre 11 pa 15 aña, mirando e fase di desaroyo cu nan ta aden, sexualidad ta bira un tema emocionante na e edad aki y curiosidad ta subi, p’esey ta importante pa informa menornan tambe tocante seguridad online pero tambe tocante sexualidad en general (Olland, n.d.). Durante cada fase di desaroyo e tema di sexualidad su forma ta cambia. Un charla cu un menor di 14 aña no ta mescos cu un charla cu un menor di 7 aña.

‘Grooming’ por pasa den un periodo cortico (siman) pa periodo mas largo (aña), pero mayoria biaha e proceso aki ta uno largo pa motibo cu e ‘groomer’ mester establece un laso di confiansa cu e menor prome (Olland, n.d.). E ‘groomer’ lo por groom e famia di e menor prome tambe, door di aparenta manera un persona di confiansa. E ‘groomer’ kier e confiansa di e famia, pasobra asina e lo ta mas facil pa acerca e menor, y famia lo no wak esaki como algo peculiar, como cu nan tin confiansa den e persona. Den un caso asina mayoria biaha e ‘groomer’ lo ta un persona conoci pa e menor y p’e famia. E por ta un otro miembro familiar, un bisiña, un coach, un maestro/a, etc.

E ‘groomer’ lo por purba isola e menor for di su famia y amigonan, pa asina e menor bira mas dependiente na dje. Asina e ‘groomer’ lo tin mas control y poder over di e menor. E ‘groomer’ lo por culpa e menor, intimid’e, pon’e sinti berguensa pa asina nan “relacion special” keda un secreto.

E ta importante pa wak casonan di grooming for di e perspectiva di un menor, cu tin ora door di lealtad, admiracion, amor, miedo, confusion y inocencia no ni sa cu nan ta pasando den un proceso di ‘grooming’.

Kico ta online grooming?

‘Grooming’ por pasa fisicamente, pero e por pasa online tambe, por ehempel ora e menor ta ariba su telefon of tablet. Medionan social, incluso weganan online, ta haci’e facil pa nos por comunica cu otro, pero e ta importante pa ta consciente y critico di e herment aki. Como cu e ta asina facil pa pone informacion (priva) di nos mes eyfo, nos ta haci nos mes vulnerabel.

Un abusador en general ta busca un prooi (obhetivo) facil, un persona vulnerabel, un persona timido, un persona cu e sa lo wanta e “secreto”. Menornan ta keda vulnerabel. Apesar cu no ta adulto so ta abusa sexualmente di menornan, adultonan ta keda e demografico mas grandi cu ta comete abuso sexual cu un menor. E adulto mayoria biaha ta pone e menor bou di un presion emocional y den mayoria caso di abuso sexual por nota un desbalansa di poder. E abusador adulto ta uza su posicion, como persona mas grandi, pa manipula e menor. Por ehempel door di bisa e menor: “Ken bo ta kere nan lo kere? Ami cu ta grandi of abo?” E ‘groomer’ ta hunga cu e emocionnan di e menor y ta pone sinti berguensa y por te asta culpa e menor p‘e abuso (KJG, n.d.). Nos no ta descarta cu abuso sexual por wordo cometi door otro menornan mes. Abuso bou di hoben ta un tema cu masha poco ta wordo papia di dje, y casonan asina ta mesun serio cu abuso cu ta wordo cometi door di un adulto. Segun un investigacion Mericano un 23% di casonan raporta di abuso sexual ta wordo cometi door di otro menornan mes (NSOPW, n.d.).

Abuso sexual no ta nifica solamente penetracion. Mishimento inapropia, acoso y intimidacion, pero tambe ora un menor ta wordo obliga pa mira y/of experiencia abuso sexual y/ of actonan sexual (incluyendo imagennan cu contenido sexual y/ of pornografico) tambe ta cay bou di abuso sexual. Un ‘groomer’ por ehempel lo por pidi e menor pa manda potret sunu of pa kita paña dilanti camara. Esakinan TAMBE ta formanan di abuso sexual. Dependiento di un caso un persona cu ta uza menornan (bou 18 aña) pa pornografia infantil por haya un castigo di maximo 8 aña of un boet di categoria 5 (Afl. 100.000,-). Te asta ora un persona provoca un menor (bou 18 aña) cu regalo, placa y/of promesa, cu e meta di haci actonan sexual (ontucht), e por haya un castigo di maximo 4 aña of un boet di categoria 4 (Afl. 25.000,-) (Doelder, Salverda, Verbaan & Verbeek, 2014).

Tacticanan cu un persona ta uza pa ‘groom’ mucha por ta lo siguiente:

· Pretende di ta un persona mas hoben

· Pretende di tin e mesun interesnan cu menor (Olland, n.d.).

· Cumpra regalo y/ of treat pa e menor

· Duna atencion y/ of conseho na e menor

· Haci promesanan (falso) na e menor

‘Groomers’ ta haci uzo di informacion cu e tin di e menor pa asina por manipula e menor mas facil, por ehempel informacion tocante loke e mucha ta gusta y interes di e mucha, nos por pensa ariba musica, pelicula, serie, buki, cuminda, deporte, hobby, etc.

Kico ta e señalnan di ‘grooming’?

· Ta sconde y tene secreto loke nan ta haci of cu ken nan ta papia den nan tempo liber, incluyendo ariba medionan social manera Facebook, Instagram, Snapchat, etc.

· E menor diripiente ta cuminsa haci uzo di medionan social na un manera excesivo of lo contrario, e menor ta stop of ta haci menos uzo di medionan social repentinamente.

· Tin un amigo of amiga (nobo) mas grandi y no ta anda cu amigonan di custumber mas of ta haci esaki menos. Tene cuenta cu ariba medionan social ta facil pa crea un profiel falso. No ta tur menor, especialmente esunnan mas chikito, ta conoci cu e terminologia di catfishing. Esaki kiermen cu tin ora nos por papia cu un persona ariba medionan social, cu ta aparenta un persona cu e no ta, door di gaña su edad, sexo, interes, etc.

· Tin placa of cosnan materialistico sin cu por splica con a yega na esaki. Corda cu ‘grooming’ por ta un tactica cu un loverboy of sugardaddy por uza pa acerca un menor tambe. No necesariamente e mester ta asina, den un otro articulo nos lo duna mas informacion tocante e topico di ‘loverboy’ y ‘sugardaddy’.

· E menor ta cambia su aparencia di un dia pa otro y ta bisti paña mas revela of sunu.

· E menor tin acceso na alcohol y/ of droga (TCS, n.d.).

· E menor ta sinti angustia, ta rabia of ta mustra manera algo ta molesti’e. E menor por isola su mes y ta mustra y sinti cu e ta leu.

· Comportacion of lenguahe sexualisa of comprendemento di sex cu no ta apropia pa e edad di e mucha. Por ehempel interaccion sexual cu otro adultonan of otro menornan di edad mas grandi.

· Ta pasa tempo ausente for di cas of ta yega cas laat di loke ta custumbra normalmente (NSPCC, n.d.).

Conscientisacion ta importante y necesario

Educando y informando nos menornan ta un paso importante pa reduci incidentenan di abuso sexual. Menornan mester conscientisacion ariba temanan di consentimento, tuma decision saludabel, sexualidad, respet, habilidadnan pa bisa ‘NO!’ y pa vocifera opinion. E ta importante pa empower nos menornan. Naturalmente cada tema mester wordo treci na un manera diferente dependiendo e edad y desaroyo di e mucha (Finkelhor & Gewirtz-Meydan, 2018). Nos ta spera e articulo aki a brinda boso mas informacion ariba e tema di ‘grooming’.

Pa mas informacion tocante e articulo aki por yama Fundacion Respeta Mi na 582-4433.

Fuente:

De Doelder, H., Salverda, B.A., Verbaan, J.H.J., & Verbeek, R.J. (2014). Wetboek van Strafrecht Aruba. Wolf Legal Publishers: Nijmegen

Finkelhor, D. & Gewirtz-Meydan, A. (2018). Sexual assault among adolescent: 6 facts. Busca ariba 27 di juni 2019, di https://theconversation.com/sexual-assault-among-adolescents-6-facts-103658

Kenter Jeugdhulp (n.d.). Seksueel misbruik 12-18. Busca ariba 27 di juni 2019, di https://kenterjeugdhulp.nl/hulpvormen/kjtc-kinder-jeugd-traumacentrum/seksueel-misbruik-12-18/

National Society for the Prevention of Cruelty to Children (n.d.). Grooming. Busca ariba 27 di juni 2019, di https://www.nspcc.org.uk/what-is-child-abuse/types-of-abuse/grooming/

National Sex Offender Public Website. (n.d.). Facts & Statistics. Busca ariba 27 juni 2019, di https://www.nsopw.gov/en/Education/FactsStatistics?AspxAutoDetectCookieSupport=1

Olland, F. (n.d.). Wat is grooming, en hoe ga je hier als ouder mee om? Busca ariba 1 di juli 2019, di https://www.oudersvannu.nl/kind/opvoeden/grooming/

The Children’s Society. (n.d.). Knowing the signs of CSE. Busca ariba 1 di juli 2019, di https://www.childrenssociety.org.uk/knowing-the-signs-of-child-sexual-exploitation