Skirbi door di: Jeanmiree van der Werf
Revisa door di: Micheline Mathurin & Shaska I. Kock

Ora nos scucha casonan di muchanan cu a pasa den abuso sexual, mayoria biaha e stempel di “pedofiel” no ta keda atras. Abuso sexual di mucha ta un tema delicado. Abuso sexual di menor ta trece un avalancha di emocion cerca nos, pero e ta un tema cu nos no por sconde p’e. Mas grandi e tabu, mas halto e obstaculo pa raporta sospecho di abuso sexual di mucha. Menos nos sa tocante abuso sexual di menor, mas dificil e ta bira pa preveni esaki. P’esey e ta importante pa e comunidad di Aruba ta consciente tocante e tema di abuso sexual di mucha.

Kico ta pedofilia?

Pedofilia ta un interes sexual. Un pedofiel ta un persona adulto cu tin atraccion sexual pa muchanan. Un pedofiel mayoria biaha lo gusta muchanan cu ainda no a yega pubertad, es decir muchanan cu ainda no a desaroya pecho, crecemento di cabey na parti intimo y cu ainda stem no a cambia. Algun pedofiel lo tin preferencia pa mucha so y tin pedofiel cu lo tin preferencia pa tanto mucha y adulto.

Pedofilia ta cay den e sistema di clasificacion di condicion psikiatrico (DSM-5) bou di parafilia, un preferencia sexual cu ta desvia di e norma cu ta prevalece (Stop It Now, z.d). Heterosexualidad, homosexualidad y bisexualidad tambe ta desvia for di e norma, pero e ultimo tres orientacion sexual cu nos ta menciona no ta cay bou di un parafilia.

Kico ta e diferencia entre un pedofiel y un pedosexual?

Pedofilia hopi biaha ta wordo confundi cu pedosexualidad. E hecho ta cu, pa con fastioso e por zona, un persona pedofiel no necesariamente lo mishi cu un mucha. Aunke cu un persona tin atraccion y deseo sexual pa un mucha pero e no mishi cun’e, esaki ta haci cu e persona no a kibra niun ley (aunke su pensamento y gusto ta inmoral y no aceptabel). Ora un persona mishi inapropia cu un mucha, nos lo papia e ora di comportacion di un pedosexual. E persona aki SI a comete un acto castigabel. Dus un persona cu en realidad mishi of haci actonan sexual, cu penetracion of no, ta un pedosexual (Seksueelmisdrijf, 2014).

E diferencia mas grandi ta, pa nos ta mas claro, cu pedofilia ta un sentimento. No tur pedofiel lo actua ariba e sentimentonan aki. Tin pedofiel cu lo ta consciente cu esaki no ta permitibel como cu e ta un abuso di mucha. Tin pedofiel cu por controla e sentimentonan aki. Pero si un pedofiel actua ariba e sentimentonan aki y abusa sexualmente di un mucha, cu penetracion of no, nos lo papia e ora di un pedosexual. Y abuso sexual contra un mucha ta castigabel (Stop It Now, z.d.).

E profiel di un “abusador” ta varia

Tin ora nos sa pensa cu casonan di abuso sexual ta wordo cometi door di un persona desconoci, pero di 90% di e casonan di abuso sexual di mucha, e mucha sa ken e “abusador” ta (AIFS, 2014).

Un persona cu ta abusa sexualmente di un mucha no necesariamente ta un pedofiel. Segun un investigacion di un centro di experticio na Hulanda tin un indicacion cu di e 90% di e casonan, solamente 30% di e “abusador” tin un diagnostico di pedofilia, den otro palabra ta un pedofiel. Esaki ta indica cu 70% di e “abusadornan” no tabata tin un preferencia sexual pa mucha. Al contrario e abuso a wordo cometi door di personanan cu NO ta un pedofiel.

Abusadornan oportunista

Abuso sexual por wordo cometi door di abusadornan oportunista tambe, of gelegenheidsplegers, esaki NO kiermen cu nan ta un pedofiel. E abuso mayoria biaha no ta plania, pero e ta wordo cometi pa motibo di cierto circunstancia, cu ta duna e abusador chens e momento ey pa abusa di un mucha. P.e. si un mucha ta na cas of ariba caya sin supervision, si e abusador ta bou di stress of otro emocionnan fuerte manera rabia. Si un persona abusa sexualmente di un mucha den seno familiar e ora aki ta trata di incest, p.e. door di un omo/ tanta, welo/ wela, tata/ mama, ruman, etc.

Abusadornan asocial

Tin ora personanan cu no por forma un relacion (amoroso) saludabel, cu tin poco empatia y no por hinca nan mes den sapato di otro tambe por yega na haci abuso sexual contra un mucha. Ta trata di personanan cu tin problema di conducta y rabia ariba e comunidad. Tin ora e personanan aki por tin rabia specificamente ariba hende muhenan. E tipo di abusador aki lo por yega na abusa di un mucha como cu un mucha ta fragil y inocente. E tipo di abusador aki hopi biaha ta opta pa abusa di un mucha desconoci y na un manera hopi violento. E tipo di abusador aki ta wordo caracterisa como un recidivista, es decir un persona cu lo keda comete e acto castigabel aki (Declercq, 2008). E combinacion entre un deseo sexual (libido) halto, un impulso halto y un consenshi abou tambe por haci cu un persona por yega na abusa sexualmente di un mucha.

Abusadornan cu un historia di abuso sexual

Personanan cu a experiencia algun trauma, p.e. abuso durante nan infancia, tambe por abusa despues di un mucha. Pa e motibo aki ta importante pa tur mucha haya e guia necesario ora nan pasa den abuso (sexual). Nos tin cu corda tambe cu abuso sexual tambe por pasa entre menornan mes. Muchanan tambe por abusa sexualmente di otro muchanan. Ta bon pa ta consciente di esaki y ekipa nos muchanan cu tools necesario pa por para pa nan mes y pone limite. Pa e motibo aki educacion sexual ta necesario di chikito caba.

Pakico e ta importante pa diferencia e tipo di “abusadornan”?

Nos sa cu e articulo aki no tabata nada facil pa lesa, pero e ta importante pa trece temanan asina padilanti. Nos lo kibra e tabu, di sconde e abuso y keda den silencio, solamente si nos papia di dje y asina nos lo proteha nos muchanan tambe.

Cu e articulo aki Fundacion Respeta Mi kier a trece dilanti cu no solamente pedosexual ta abusa sexualmente di mucha. Maske cu casonan di abuso mayoria biaha ta wordo cometi door di un ser masculino, nos no mester descarta e hecho cu hende muhe tambe por abusa sexualmente di un mucha. Semper mester tene cuenta cu e sexualidad, competencia social, habilidad cognitivo, grado di agresion, proceso di grooming y problemanan di relacion di e sospechoso. Tambe mester tene cuenta cu e circunstancianan bou di cual e delito a tuma luga, paso no ta solamente sentimento di pedofilia ta conduci na abuso sexual di mucha. Mas conocemento nos tin di e topico, mas miho nos lo por preveni abuso sexual di mucha.

Si bo tin pregunta of ta desea di sa mas informacion tocante abuso y negligencia di mucha yama Fundacion Respeta Mi na 582-4433

Si bo ta sospecha cu un mucha ta wordo abusa den un forma of otro of bo ta desea di raporta un caso di abuso, yama meldpunt nacional di Aruba: Bureau Sostenemi na 588-1010

Fuente

Australian Institute of Family Studies. (2014). Who abuses children? Busca ariba 29 di november 2018, di https://aifs.gov.au/cfca/publications/who-abuses-children

Berlin, F.R. (2014). Pedophilia and DSM-5: The Importance of Clearly Defining the Nature of a Pedophilic Disorder. Busca ariba 23 di juni 2020, di http://jaapl.org/content/42/4/404

Bicanic, I., & Gerda, A. (2019). Boycot op muziek van Michael Jackson bevestigt het taboe. Busca ariba 7 di mei 2019, di https://www.nrc.nl/nieuws/2019/03/14/boycot-op-muziek-van-michael-jackson-bevestigt-het-taboe-a3953295?fbclid=IwAR3Hc4uCtwZvWzK4inXmFwcCAor7vGQFVJPv7UUlhxGLkgqPU18hUIxT9QQ

Declercq, F. (2008). Seksuele, geweld- en levensdelicten: psychopathologie van daders. ACCO uitgeverij.

Seksueelmisdrijf. (z.d.). Wie plegen seksueel misbruik van kinderen?

Stop It Now. (z.d.). Busca ariba 27 di november, di https://stopitnow.be/faq