Boso a wak e serie limita, ‘Jeffrey Epstein: Filthy Rich’, di Netflix caba?

Jeffrey Epstein: Filthy Rich. (2020). Available on Netflix.

Den e serie aki varios tema ta wordo toca cu nos, di Fundacion Respeta Mi, ta boga p’e. Entre otro:

Grooming

Un tactica cu ta wordo uza door di abusadonan pa asina nan haya e confiansa di e (posibel) victima. Groomers ta busca muchanan vulnerabel, pasobra groomers sa cu nan lo haya nan confiansa mas facil y tin mas chens pa nan keda den silencio despues di e abuso. Groomers ta busca muchanan cu problemanan social, cu un autoestima abou y muchanan den necesidad. Groomers nan modus operandi ta consisti di; duna regalo of otro cosnan materialistico of door di duna apoyo y atencion. Groomers sa cu muchanan cu ta bin di un famia cu problema social tin falta di atencion y amor, y e lo uza esaki na nan beneficio. E groomer na final kier p’e victima bira dependiente di dje. Den e serie por wak bek con hobennan menor di edad tabata wordo paga pa haci actonan sexual cu nan NO a duna consentimento na dje.

Consentimento

Consentimento t’e edad cu’n persona por duna permiso pa haci sex. Muchanan bou 18 aña NUNCA por duna permiso pa haci actonan sexual, especialmente si e otro persona ta un adulto. Den varios caso nos ta wak cu victimanan di abuso sexual lo culpa nan mes despues di e abuso. Nan ta pensa cu ta nan fout, y e pensamento aki sin duda ta algo cu abusadonan tin influencia ariba dje. Na Aruba e edad di consentimento ta 16 aña, kico boso ta pensa di esaki?

Lovergirls & traficacion sexual di menor

Den e serie, ‘Jeffrey Epstein: Filthy Rich’, e abusado ta te hasta uza menornan di edad como lovergirls (pimps) pa asina e por yega mas facil na su victimanan. Pues tambe por wordo papia di traficacion sexual di menornan. Loke ta mas preocupante ta cu e abusado tabata uza su pareha como medio tambe pa yega mas facil na menornan di edad pa asina por haci actonan sexual. Den e serie por mira con nan tabata purba normalisa e abuso pa asina esaki por tin un efecto psicologico ariba e victima cu loke tabata pasando ta “normal”. Esaki por wordo mira bek tambe den e casnan cu e abusado tabata posee, cu tabata yena cu imagennan sunu di mucha muhe hoben. Den casonan di abuso sexual e abusado por uza pornografía, den e caso aki imagennan, pa purba di “desensitize” e victima su percepcion, pa asina “normalisa” e abuso.

Profiel di un abusado

Ora nos pensa ariba abuso sexual, e palabra ‘pedofiel’ tin ora ta drenta nos pensamento mesora. Nos ta cuminsa crea un profiel den nos cabes di un persona cu nos ta pensa cu lo ta capas di haci algo asina cruel cu’n mucha. E ta importante pa ta cuidadoso na momento di crea stereotipo di e profiel di un abusado, pasobra tin ora e por t’e persona cu menos nos ta kere. Un pensamento cu tin ora nos tin ta: “no, e persona ey hamas lo haci algo asina cu’n mucha, ami conoce di basta tempo y nunca el a haci algo asina cu mi y mi no a mir’e haci algo asina cu otro mucha tampoco.” Nos kier remarca cu abuso sexual di menor ta algo cu ta pasa scondi, e abusado sa cu loke e ta haciendo ta inmoral y ilegal. P’esey den casonan di abuso sexual poco biaha nos ta mira un persona ta testigua den corte of tin evidencia (audio-visual) caminda por mira e acto di abuso bek.

E serie di Jeffrey Epstein tambe ta demostra kico ta pasa ora un abusado no haya consecuencia p’e actonan ilegal cu e tabata haci contra menornan di edad. E abusado a haci uzo di su status y su circulo social pa haci actonan inmoral cu mucha muhenan menor di edad, y pa basta aña justicia NO a prevalece na fabor di e victimanan. Den casonan di abuso sexual (di menor) tin ora por wordo papia di revictimisacion, no solamente door di e manera cu investigacion (forensico) ta wordo haci, pero tambe door di reaccion adverso di comunidad (victim blaming), pero tambe ora cu e abusado ta sali liber sin ningun consecuencia.

Disclosure

Semper keda alerta den ken nos ta confia cu nos muchanan y mas importante ainda: semper kere un victima y brinda apoyo ora e bin dilanti cu un caso di abuso, pasobra e apoyo ta algo di suma importancia p’e proceso di recuperacion di cada victima, hunto cu guia profesional.

E serie aki sigur ta siña nos e importancia di no pone stereotipo pa abusadonan. No ta tur loke ta briya ta di oro y tin ora abusadonan ta manera wolf scondi den lana suave di carne, den e caso di Jeffrey Epstein, bachi cu dashi. Den e serie nos por wak con Jeffrey Epstein a te hasta “groom” un departamento di polis cu recursonan, algo tipico cu groomers ta haci tin ora, pero cu mayornan! Jeffrey, mescos cu hopi otro abusado sexual, a sa di gaña hopi hende cu su caracter simpatico.

Tin ora nos ta hay’e asina dificil pa kere cu’n persona lo yega asina leu na abusa sexualmente di un mucha. Si nos para keto un rato y pensa critico, nos lo ripara cu tin ora, ora e berdad no ta conbini nos pasobra ta trata di un idolo of un persona cu nos ta stima y aprecia, nos ta bira cara p’e berdad y nos ta scohe (conscientemente) pa kere e abusado y NO E VICTIMA.

Yuda nos conscientisa door di share e articulo aki. Mas educa nos ta tocante e topico aki, miho nos por preveni casonan di abuso sexual. Scuch’e. Ker’e. Yud’e.

Fuentenan:

NSPCC. Grooming. Busca ariba 1 juni 2020, di https://www.nspcc.org.uk/what-is-child-abuse/types-of-abuse/grooming/