Tur aña nos ta spera cu nos ta bay keda cla na tempo cu tur nos cosnan y pasa dianan di fiesta feliz y trankil, scuchando melodianan bunita di pasco. Pero ora nos tin yiu esaki por bira un poco dificil. Especialmente pa motibo cu temporada di fin di aña tambe por trece tension pa un mucha, pero no worry e tension aki no semper ta negativo. Un mucha simplemente por ta hopi entusiasma pa wak su wela, hunga cu su primonan y sinti e dushi ambiente cu fin di aña ta trece cun’e.

Tin ora nos ta priminti nos mes cu otro aña nos ta bay cuminsa cu trabounan di cas mas trempan, cu nos ta bay worry menos cu cosnan materialista, cu nos ta bay come menos, etc. Tin ora nos ta tene nos mes na e promesanan aki, tin ora nos simplemente ta lubidanan. Manera nos a bisa siman pasa, un di e causa mas grandi pa tension y stress durante fin di aña ta: pone expectativanan irealistico pa nos mes.

Por tin diferente factor pa cu esaki. Tin ora nos kier luci expectacular durante dianan di fiesta (nada malo cu esaki, ta bon pa nos treat nos mes de bes en cuando), come extra porcion di cuminda dushi (pa despues haya sentimentonan di culpa pa a come dimas of kisas nos ta pensa toch ta un bes pa aña), bishita miembro di famia (aunke e ta laga nos bon cansa) of bebe e extra copi di alcohol (sabiendo cu ya nos a cuminsa sinti e efecto di alcohol caba un tiki).

Ora nos sinti mas stress cu normal, nos lo tin un otro perspectativa di e manera cu nos yiunan ta comporta. Tur e factornan menciona ta factornan cu por conduci na abuso di mucha y violencia domestico. P’esey ta importante pa ta consciente di nos actonan durante dianan di fiesta. Mas consciente nos ta di nos sentimientonan y emocionnan mas miho e lo ta pa controla esaki (ora ta necesario). P.e. si nos ta sinti nos mes rabia y irita, probablemente nos mester un break. Tuma esaki ora nos ta sinti e necesidad aki. No no mester ignora nos necesidadnan, nos mester cuida nos mes bon pa nos por cuida nos muchanan. Nos mester corda cu nos tin un tarea importante tur dia di aña, cual ta brinda nos muchanan amor, atencion, seguridad y confiansa.

Durante dianan di fiesta nos por probecha e dianan liber pa disfruta y pasa tempo cu e muchanan. Haci cos leuk cu nan. Si nos ta bay bishita famia, nos mester corda ariba nos responsabilidad como mayor y cuidador di e mucha. Ora nos haci bishita nos por tin e tendencia di lubida e structura cu nos ta brinda nos muchanan na cas y “kijk door de vingers”, p.e. mucha mag di haya extra mangel.

Tin ora e reglanan cu nos ta pone pa nos yiunan na cas por wordo mira straño pa otronan, incluyendo nos famia. Nos no mester sinti berguensa di esaki. E mucha mester di structura. E mucha kier scucha kico nos ta spera di dje. P.e bebe juice prome y despues mag di kies un co’i hunga.

Ta importante pa duna nos muchanan atencion durante dianan di fiesta, asina nan lo sinti nan mes sigur y stima. Muchanan cu no ta haya suficiente atencion lo bay busca esaki na un manera negativo. Algun ehempel ta door di grita, tira cos di hunga pa malo, susha muraya pa malo, tenta, bringa cu otro rumannan, papia palabra malo, etc. Ban reserva un ora, of dos, durante dianan di fiesta pa haci un actividad cu nos muchanan. Haci esaki interactivo, paga e telefon si ta necesario. Ban inverti den nos muchanan y ban duna nan nos tempo y ban brinda nan esaki cu calidad, no solamente pa pret pero pa haci e laso entre mucha y mayor mas fuerte.

Corda cu lantamento di un mucha ta trata di “teamwork”. Nos mester ta den mesun team, despues di tur cos nos tur tin e mesun meta di lanta nos yiunan den un ambiente safe y amoroso, toch? Dus ban brindanan esaki tur dia di aña. No mester worry ken su kerstboom ta mas grandi cu di otro of ken su paña ta briya mas. Ban worry cu e bienestar y felicidad di nos muchanan door di brinda nan amor, atencion, seguridad y confianza, paso esaki ta loke nan ta bay aprecia ora nan bira mas grandi.

Algun tips pa nos tene cuenta cun’e durante dianan di fiesta:

1. Flexibilidad mag, pero no permiti tur cos cu e mucha ta desea como cu ta un dia di fiesta. Si ta dos cuki e mucha mag di haya, keda ariba bo palabra. Sea consistente cu e mucha!

2. No laga otro pone bo sinti malo di e manera cu abo ta lanta bo yiu. Nos tur ta lanta nos yiunan na un manera diferente. Claro cu tin varios similaridad, pero nos tur tin nos mesun custumbernan, y ta totalmente okay pa uza diferente strategianan na momento di lanta un mucha. Corda si cu abuso y negligencia di mucha na NINGUN momento ta okay (ni na momento cu nos tin hopi stress), e bienestar y desaroyo di nos muchanan nunca mag di wordo poni na peliger.

3. Ta okay pa pone prioridadnan y simplemente bisa “No, mi no por”. Pone limite ta esencial, y aunke tin ora esaki por wordo tuma na malo, tin ora tin cosnan cu tin mas urgencia/ importancia cu otro, dus nos sinti malo si hende trek bo un cara pa motibo cu bo no por traha e webo yena e aña aki of pa motibo cu no por asisti na un fiesta.

4. Pasa tempo cu nos muchanan. No ta necesario pa plania un dia yena cu actividad, pero invita e mucha pa boso decora hunto, laga e mucha yuda bo traha algun hapjes, canta cu e mucha, expresa kico bo ta sinti pa e mucha. Nos muchanan kier conexion, no perfeccion durante dianan di fiesta. Loke ta importante ta pa pasa tempo hunto cu nos sernan keri. Esaki ta loke realmente ta haci nos feliz durante dianan di fiesta toch?…djis pens’e un rato. Tip: si e mucha ta chikito ainda por opta pa decoracion cu no por kibra/ of cu ta menos fragil.

5. Gradici nos muchanan ora nan yuda nos cu algo durante dianan di fiesta. Si e mucha yuda traha cuki of yuda cu algo otro den cas, dun’e un compliment pa su esfuerso.

6. NO forsa nos muchanan cuminda hende cu brasa y sunchi. Esaki ta viola e mucha su espacio y por pone e mucha sinti incomodo. Bo ta corda nos post y articulonan anterior tocante siña nos muchanan pone limite personal y loke nan ta acepta of no acepta? Nos muchanan por simplemente bisa “bon pasco” of “bon aña”, si e mucha mes ta desea e por duna brasa, pero por fabor no ban obliga niun mucha pa haci algo cu nan no kier (no, nos muchanan no lo tin mal manera si nan no kier cuminda cu brasa of sunchi). Especialmente si e ta pone nan sinti incomodo.

Si bo tin pregunta tocante e articulo aki of bo kier sa mas tocante abuso y negligencia di mucha durante dianan di fiesta yama Fundacion Respeta Mi na 582-4433

Si bo kier sa mas tocante con pa comunica cu bo yiu of bo mester conseho tocante lantamento di bo yiu yama Tienda di Educacion na 161 (gratis) of Fundacion Pa Nos Muchanan na 583-4247

Fuente:

Brill, A. (2017). Have A Happy Holiday Season With These Proven Parenting Tips. Busca ariba 12 di december 2018, di https://www.positiveparentingconnection.net/how-to-stress-proof-your-parenting-for-a-happy-holiday-season/

Arnold, K. (2011). Tips for Holidays and Parenting: Letting Joy Win over Stress. Busca ariba 11 di december 2018, di https://www.psychologytoday.com/us/blog/the-older-dad/201111/tips-holidays-and-parenting-letting-joy-win-over-stress

Egry, Z. (n.d.). When your family doesn’t like how you parent. Busca ariba 11 di december 2018, di https://www.handinhandparenting.org/2017/01/family-dont-like-how-i-parent/