Den cada etapa di nos bida nos ta enfrenta obstaculonan cu lo afecta nos desaroyo personal na un manera positivo of negativo. Esaki Erik Erikson su teoria di etapanan di desaroyo psicosocial ta mustra nos. Segun Erikson, nos muchanan ta enfoca durante nan añanan escolar ariba nan habilidad pa ta “productivo” y “capas”. Pa un mucha e ta sinti “bon” y “dushi” pa por hunga, skirbi, lesa, siña, sera amistad, etc. E sentimiento di “mi por” y “mi ta capas” ta di suma importa importancia. Bo tabata sa cu e sentimiento aki ta un factor protectivo contra abuso (sexual) di mucha?

E sentimiento di “mi por” ta nifica mas di loke nos ta imagina. Ora un mucha ta lanta cu confiansa den su mes y ora un mucha tin apoyo di personanan di confiansa, e mucha ta lanta mas resistente pa enfrenta obstaculonan, pero tambe experiencianan negativo, entre otro abuso y negligencia di mucha.

E necesidad emocional di un mucha combina cu nan inocencia ta crea un ambiente ideal pa posibel abusadornan cu lo kier groom y manipula un mucha. Muchanan cu tin poco confiansa den nan mes y cu tin poco personanan di confiansa cu e lo por aserca pa apoyo y guia, ta muchanan cu lo ta mas vulnerabel den bista di un posibel abusador. Un mucha cu tin menos confiansa den su mes lo wordo mira como un “easy target” pa un posibel abusador y no, esaki NO tur ora ta un pedofiel. No ta pedofiel so ta abusa sexualmente di mucha.

Desaroyo di nos muchanan ta hunga un papel importante. E desaroyo di nos muchanan ta depende di e interaccion entre mucha y adultonan. Serca muchanan y hobennan, peers tambe ta importante pa nan desaroyo, especialmente ariba e parti social. Como cuidador (mama, tata, voogd, juffrouw, meneer, etc.). nos por haci un contribucion na esaki door di brinda e mucha guia durante su desaroyo. Si un mucha ta sinti e apoyo aki, e lo tin mas confiansa pa sigui desaroya, pero tambe pa explora y siña cosnan nobo y mas cu claro defende nan mes ora ta necesario. E guia y apoyo aki mester wordo experiencia door di e mucha como uno caluroso y positivo, caminda nos muchanan tambe ta haya espacio pa delibera hunto cu mayor of educador. Nos muchanan tin cu haya respet pa asina nan siña brinda respet bek tambe na otro. P’esey e ta importante pa di chikito stimula un mucha pa e tambe duna su opinion.

Motiva nos muchanan durante cada etapa, yuda nan pa nan haya confiansa den nan mes y duna nan compliment. Un mucha resistente y fuerte lo para pa su mes mas miho compara cu un mucha cu ta haya poco atencion y guia. E sentimiento di confiansa ta importante y como adultonan cu kier brinda nos muchanan seguridad, lo por aporta na esaki door di papia cu nos muchanan tocante seguridad di nan curpa.

Como adultonan cu kier proteha nos muchanan e ta di suma importancia pa di chikito caba nos ta honesto cu nan tocante nan curpa. E ta importante pa duna nan tools pa asina nan proteha nan mes. Conta nos muchanan tocante nan parti intimo (pilinchi, nunu, pecho y anus) ta un di e formanan pa brinda nos muchanan informacion tocante proteccion di nan curpa.

Pa mas informacion yama Fundacion Respeta Mi na 582-4433

Pa conseho y guia encuento lantamento di nos muchanan yama Tienda di Educacion na 161

Fuente:

Becker. A. (2012). Inleiding in de pedagogiek. Van Gorcum: Assen

The Mama Bear Effect. (z.d.). Cognitive Development: Finding Their Strenghts. Busca ariba 5 di maart 2019, di https://themamabeareffect.org/rock-the-talk/grade-school/

McLeod, S. (2018). Erik Erikson’s Stages of Psychosocial Development. Busca ariba 5 di maart 2019, di https://www.simplypsychology.org/Erik-Erikson.html