Awendia nos por observa cu un cantidad grandi di nos muchanan y hobennan ta haci uzo di aparatonan electronico, miho conoci como smart devices. Nos por pensa entre otro ariba tablet, celular, laptops, etc. Na Aruba 80% di uzadornan di internet ta hobennan, segun Bureau Central di Estadisticanan di Aruba (CBS, 2017).

Dia 5 di februari tabata Safer Internet Day, un dia pa promove y stimula uzo positivo di internet bou di nos muchanan y hobennan. Esaki mas cu claro ta necesario, como cu e uzo di internet por trece consecuencianan cun’e. Abo sa con safe nos muchanan ta online?

Tin diferente motibo di cual muchanan y hobennan ta haci uzo di aparatonan electronico y internet. Internet ta wordo uza hopi pa hunga weganan online, scucha musica, aumenta creatividad, pero tambe pa comparti y conecta cu amigonan. Tremendo toch? Ademas nos muchanan y hobennan por adkiri diferente conocemento y habilidadnan door di haci uzo di internet. Internet tambe tin un funcion educacional; hobennan por haci uzo di aparatonan electronico y internet pa haci nan tareanan y proyectonan di scol.

Uzo di medianan social ta nifica: posting & sharing. Uzo di medianan social ta inclui: creacion di un profiel, post potret, laga comentario, chat, subi potret y video, comparti links, etc (Raising, 2018).

Medianan social, miho conoci como social media, ta hunga un papel importante den e bida diario di nos muchanan y hobennan. Restriccion di edad pa plataformanan popular manera Facebook, Instagram, Snapchat, Twitter, etc. ta 13 aña bay ariba. Uzo di YouTube pa wak videonan tambe ta 13 aña minimo, pero cu permiso di un adulto, como cu ta cuenta di e adulto mester wordo uza pa tin acceso ariba YouTube (Graber, 2014). Lamentablemente no tur ora ta wordo cumpli cu e regla aki y asina nos por wak muchanan di 8 aña cu un cuenta di Facebook of Snapchat, maske esaki ta bay contra nan “policy”.

Restriccion di edad pa e uzo di medianan social ta di suma importancia. Ora un mucha traha un cuenta ariba medianan social su informacion personal lo ta na peliger, entre otro su nomber completo, adres, number di telefon y otro datonan cu lo por identifica e mucha su ubicacion. Na Merca e ley di COPPA (Children’s Online Privacy Protection Rule) ta proteha tur mucha bou di e edad di 13 aña. Lamentablemente e ley aki no ta aplicabel pa Aruba.

E ta un deber di nos tur como adultonan responsabel pa guia y stimula tur nos muchanan y hobennan door di papia cu nan y informa nan di e peliger di comparti informacion personal den e mundo virtual. Muchanan bou di 13 aña no a desaroya e habilidadnan cognitivo ainda pa tuma decisionnan saludabel encuanto e uzo di internet, nan mester di nos guia pa cu e parti aki (aunke nan wak nos cu un cara zuur) (Graber, 2014).

Apesar di tin varios beneficio, internet tambe por tin algun inconveniencia y risico pa nos muchanan y hobennan manera:

· wordo exponi na contenidonan inapropia, violento y/ of sexual

· subimento facil di potretnan y videonan bergonsoso of kisas provocativo ariba medianan social

· partimento di informacion personal cu hende straño

· cyberbullying: tentamento ariba medianan social

Prohibicion tin poco sentido… dus kico nos como adulto por haci pa proteha nos muchanan y hobennan?

· E esencia ta comunicacion. E miho manera pa proteha nos muchanan ta door di papia cu nan y haci palabracionnan.

· Papia tocante uzo positivo di internet; puntra e mucha con e lo comporta y con e lo kier wordo trata door di otronan ariba medianan social.

· Un investigacion recien na Hulanda ta indica cu un 83% porciento di mayornan ta wak telefon di nan muchanan (Telegraaf, 2019). Controla e telefon di nos muchanan y hobennan constantemente no ta un solucion, esaki lo por te asta haci cu nan lo por distancia nan mes mas di nos y te asta perde confiansa den nos. Esaki nos no kier, nos kier juist pa nos muchanan y hobennan confia nos. Ademas nos muchanan tin derecho ariba privacy.

· Pa ningun motibo (ni pa con special e momento por ta) no post potret sunu of cu poco paña di nos muchanan ariba medianan social of messaging apps, manera Whatsapp.

· Investiga hunto con pa haci e uzo di internet na un manera mas safe (un articulo tocante “seguridad online” lo wordo publica den transcurso di aña).

· Uza privacy settings: haci esaki hunto. Splica tambe cu NO mester comparti password cu niun hende, ni maske nan ta personanan di confiansa. Password ta algo personal!

· Aplica e regla: “Bo no conoc’e, no acept’e!” (Ben-Joseph, 2018).

· Be a role model! Nos muchanan ta siña di adultonan cu ta importante den nan bida. Asina ta…sea un bon ehempel.

Pa mas informacion tocante e articulo aki yama: Fundacion Respeta Mi na 582-4433

Pa tips of conseho di con pa comunica y guia bo yiu yama: Tienda di Educacion na 161 (gratis)

Fuente

Ben-Joseph, E.P. (2018). Teaching Kids to Be Smart On Social Media. Busca ariba 4 di februari 2019, di https://kidshealth.org/en/parents/social-media-smarts.html

Central Bureau of Statistics Aruba. (2017). ICT Survey 2017. Busca ariba 4 di februari 2019, di http://cbs.aw/wp/index.php/2019/01/09/ict-survey-2017-info-graphics/

De Telegraaf. (2019). Ouders gluren massaal op mobiel van hun kind. Busca ariba 5 di februari 2019, di https://www.telegraaf.nl/nieuws/3110599/ouders-gluren-massaal-op-mobiel-van-hun-kind?utm_source=google&utm_medium=organic

Graber, D. (2014). 3 Reasons Why Social Media Age Restrictions Matter. Busca ariba 4 di februari 2019, di https://www.huffingtonpost.com/diana-graber/3-reasons-why-social-media-age-restrictions-matter_b_5935924.html

Raising Children. (2018). Social media for children and teenagers. Suitable for 9-18 years. Busca ariba 4 di februari 2019, di https://raisingchildren.net.au/teens/entertainment-technology/digital-life/social-media