E ultimo dos simannan nos a papia tocante abuso sexual di mucha homber y tocante e importancia di papia tocante sex. E rason mas grandi pa un (mucha) homber mantene su experiencia cu abuso sexual den secreto, ta pa motibo di miedo di wordo percibi como un persona homosexual. Abo tabata sa cu alrededor di e tema di abuso sexual di mucha homber tin varios interpretacionnan robes? Den e articulo aki nos lo bay papia un tiki mas tocante pensamentonan hende ora ta trata di abuso sexual di mucha homber, pero cu no tur ora ta cuadra cu realidad.

1. Solamente hombernan gay ta abusa otro hombernan sexualmente.

Mayoria hende homber cu a yega di abusa sexualmente di un mucha homber, ta identifica nan mes como un persona heterosexual. E persona cu ta abusa sexualmente di un (mucha) homber ta haci esaki como cu abusando di un (mucha) homber lo dun’e un sentimiento mas grandi di dominio. Abuso sexual hopi biaha ta trata mas di violencia y furia cu atraccion sexual.

2. Un mucha homber no por wordo abusa sexualmente door di un ser femenino.

Hende muhe tambe por abusa di un mucha homber sexualmente. E casonan aki raramente ta wordo raporta. Ora ta papia di abuso sexual di mucha homber, esaki no necesariamente kiermen cu mester tin penetracion. E ser femenino cu ta abusa di e mucha homber por uza objectonan of coy hunga sexual ariba un mucha homber. E no ta straño si un mucha homber haya un ereccion na momento cu e wordo abusa sexualmente, como cu esaki ta parti di su reaccion fysico.

3. Ora un mucha homber haya un ereccion durante cu e abuso sexual ta tumando luga, ta nifica cu e victima a “gusta esaki” y “tabata kier esaki”

E mito aki por causa hopi culpa, berguensa y confusion serca mucha hombernan cu a bira victima di abuso sexual. Stimulacion fisico por causa un ereccion, cu e victima kier of no. Esaki ta un reaccion automatico di e victima su curpa. E victima no tin control ariba esaki.

4. Abuso sexual di mucha homber mayoria biaha ta wordo cometi door di un persona desconoci

Hopi biaha e persona cu intencion di abusa di un mucha tin un posicion autoritario den e bida di e mucha. Tambe sa pasa cu e persona cu intencion di abusa di e mucha tin un status of un posicion di independencia den bida di e mucha. E por ta un persona na e ken un mucha ta mara na dje of un persona cu un mucha ta admira. E persona cu intencion di abusa di un mucha lo por purba manipula e mucha door di dun’e atencion, privilegionan special, placa of regalonan. Hopi biaha e persona cu tin intencion di abusa di un mucha ta un persona cu ta conoci pa e mucha.

5. Mucha hombernan cu a wordo abuso sexualmente ta sufri menos compara cu mucha muhenan

Tur victimanan di abuso sexual lo enfrenta hopi biaha cu e mesun reaccionnan: depression, rabia, ansiedad, confusion, miedo, insensibilidad, culpabel (cu su mes), impotencia, suicidal y berguensa. Tin algun reaccion cu ta mara na e gender di e persona, p.e. hende homber cu a sobrevivi e abuso ta na riesgo mas halto di comete suicidio.

6. Abuso sexual no ta pasa entre parehanan (pa hobennan cu tin pareha)

Abuso sexual por pasa den cualkier relacion. Pa medio di abuso sexual fisico, psicologico y manipulacion emocional un persona lo por wordo forsa door di nan pareha pa participa den sexo sin consentimiento. Un persona den un relacion NO T’E PROPIEDAD SEXUAL DI SU PAREHA.

Un persona cu wordo abusa por kibra e circulo vicioso. Apesar cu un mucha homber experencia abuso e por desaroya den un adulto fuerte, determina y saludabel. Comunidad di Aruba por contribui na esaki door di scucha y kere e mucha.

Si boso tin mas pregunta of algun duda tocante abuso sexual di mucha yama Fundacion Respeta Mi na 582-4433.

Si bo ta sospecha cu un mucha ta wordo abusa den un forma of otro of bo ta desea di raporta un caso di abuso, yama meldpunt nacional di Aruba: Bureau Sostenemi na 588-1010

Fuente

Association of Alberta Sexual Assault Services. (n.d.). Men and Sexual Assault. Busca ariba 12 di november, di https://aasas.ca/support-and-information/men-and-sexual-assault/

Hopper, J. (n.d.). Facts About Sexual Abuse of Boys. Busca ariba 14 di November, di https://www.jimhopper.com/child-abuse/sexual-abuse-of-boys/facts-about-sexual-abuse-of-boys/#boys-and-men-can-be-sexually-used-or-abused-and-it-has-nothing-to-do-with-how-masculine-they-are