Ayera Fundacion Respeta Mi a anuncia su tema annual oficialmente na comunidad di Aruba. E aña aki Fundacion Respeta Mi ta bay enfoca ariba negligencia di mucha.

Negligencia ta un forma di abuso di mucha cu merece di haya mas atencion. Door di brinda informacion Fundacion Respeta Mi kier conscientisa Aruba completo di kico negligencia ta y con pa preveni esaki.

Cuanto biaha nos ta lubida di puntra nos muchanan con nan dia a bay? Tin ora nos por lubida of tin ora nos ta cansa y nos no tin energia pa puntra nos muchanan esaki. Pa haya un balansa ta dificil, especialmente si bo ta un persona druk y cu hopi responsabilidad. Imagina si un mucha nunca ta wordo puntra pa su opinion, imagina si un mucha nunca ta haya atencion, y cu nunca nos kiermeen literlamente tur dia. Imagina un mucha cu ta wordo nenga tur dia di haya amor, atencion y sosten emocional.

Negligencia emocional ta un forma di abuso di mucha pasivo. Negligencia emocional ta dificil pa señala pa motibo cu e tipo di maltrato aki no tur ora ta visibel. E ta dificil pa reconoce negligencia emocional como cu e tipo di abuso di mucha aki no ta laga rastro ariba e curpa di un mucha. E ta importante pa realisa cu negligencia emocional y falta di atencion p’e desaroyo emocional di un mucha por haci mesun dolor y daño cu otro formanan di abuso di mucha, entre otro abuso fisico.

Muchanan ta fiel na nan mayornan, esaki ta haci’e dificil pa muchanan bisa cu nan no ta hayando atencion na cas. Tin ora muchanan a custuma cu nan no ta haya atencion y sosten emocional, cu consecuencia cu e mucha ta bay pensa cu esaki ta “normal”.

Un mucha no lo por desaroya adecuadamente sin cuido y sosten emocional. Esaki no necesariamente mester bin di su mayornan, aunke mayornan ta keda e personanan principal cu ta responsabel p’e bienestar di nan yiunan. Adultonan cu ta forma parti di un mucha su bida tambe por contribui na bienestar di un mucha. Esaki nos por haci simplemente door di papia cu un mucha cu bo ta ripara y sinti cu mester di mas atencion y sosten emocional. Puntr’e con su dia bay y kico tur el a haci. Reconoce tambe cu e mucha ta pasando den un situacion dificil. Esaki por laga laga un mucha sinti mas miho y dun’e un poco alivio tambe. Muchanan cu ta wordo neglisha lo recupera mas miho y lo bira adultonan mas resistente si nan haya atencion y sosten emocional for di personanan di confiansa.

Kico mas nos por haci pa yuda un mucha cu ta wordo neglisha?

· Reconoce cu e mucha ta wordo neglisha emocionalmente; p.e. si bo ripara cu e mucha tin falta di atencion of si e mucha ta pasa hopi tempo su so.

· Papia cu e mucha. Simplemente combersa cun’e.

· Mayornan ta responsabel pa un mucha, pero no culpanan. Yuda nan busca sosten y duna nan alternativanan. No ta tur mayor ta consciente cu nan ta neglishando nan yiunan. P’esey sosten ta di suma importancia.

· Tuma contacto cu Bureau Sostenemi na 588-1010 (gratis) si bo ta precupa pa un mucha su bienestar.

Pa mas informacion yama Fundacion Respeta Mi na 582-4433

Bo kier tips of guia di con pa comunica cu nos muchanan? Yama Tienda di Educacion na 161 (gratis)

Fuente:

Bonnet. R. (2013). De Kleine Gids Kindermishandeling. Wolters Kluwer: Deventer.

Geerdink, F. (2011). Psychische mishandeling en emotionele verwaarlozing van kinderen.