Tin ora negligencia emocional & abuso emocional ta wordo mescla cu otro, pero kico exactamente ta e diferencia?

Abuso emocional ta manera un mucha ta wordo golpia cu palabra, e mucha ta wordo abusa emocionalmente. E abuso no ta sosode un biaha so, esaki ya ta algo cu ta forma parti di un patronchi di intimidacion y por te asta pasa diariamente (Oosten, 2018). Abuso emocional no ta solamente insulta un mucha door di yam’e pa: “bobo”, “burico”, etc. Abuso emocional, ta ora un mucha ta wordo ridiculisa, ta wordo yama pa nomber y te asta ora e mucha ta wordo controla na un manera excesivo. Abuso emocional por pasa scondi den cas, pero un mucha por te asta wordo humilia den publico. Ora un mucha ta wordo compara cu otro mucha y ta wordo bisa: “e mucha ey si por, dicon abo no? Bo no ta sirbi pa nada!” tambe ta wordo considera como abuso emocional. Abuso emocional ta un acto, esaki kiermeen cu un adulto ta haciendo un forma di abuso cu un mucha. Esaki por ta cualkier adulto, cu tin e cuido principal di un mucha (Kaptein, 2017).

Negligencia emocional ta fayo consistente di un adulto cu tin e cuido principal di un mucha, pa brinda un mucha cu apoyo emocional, atencion y afeccion apropia. Den e caso aki e adulto ta “faya pa actua” ariba aspectonan cu ta esencial pa un mucha su desaroyo. Negligencia emocional tambe ta ora un adulto cu ta responsabel pa un mucha su cuido ta faya di nota conflictonan cu un mucha por ta pasando aden, pero tambe su preocupacion y emocionnan. Door di simplemente puntra un mucha: “hey con a bay awe?” bo lo ta hacienda un diferencia. Negligencia emocional por wordo mira manera ora un mata no ta haya awa. Un mucha cu ta wordo neglisha emocionalmente mester siña con pa sobrevivi sin awa, es decir sobrevivi sin apoyo emocional na momento cu mas e tin mester di esaki (Webb, 2016).

Un persona cu a wordo abusa emocionalmente tempo cu e tabata mucha lo por crece cu dificultad pa haya feedback y lo por wak esaki directamente como un critica. E persona aki mes lo por bira un mayor critico y cu expectativanan cu no ta realistico pa e edad y desaroyo di su yiu. E persona lo por spera perfeccionismo for di su yiu y por ta exigente cu e mucha. Un persona cu a crece den un ambiente caminda e tabata wordo abusa emocionalmente lo tin dificultad pa controla y expresa nan emocionnan.

Un persona cu a wordo neglisha emocionalmente tempo cu e tabata mucha lo pone tur otro persona, menos su mes, na prome luga. E persona aki un dado momento lo por te asta lubida cu e tambe mester di “awa” pa sobrevivi, e tambe tin mester di apoyo emocional. E persona aki tin ora ta ful inconsciente di e necesidad aki, aunke su curpa y alma ta sinti pisa y bashi, aunke e ta sinti su so apesar di tin personanan cu ta stim’e y cu ta preocupa p’e.

Un persona cu a crece den un ambiente caminda e tabata wordo neglisha emocionalmente lo sconde nan sentimientonan, nos ta papia e ora di sentimientonan suprimi. E persona mes lo no tin acceso na su mesun sentimientonan y ta faya di reconoce su emocionnan. Ademas personanan cu un historia di negligencia emocional lo por hay’e dificil pa pone limite na ora, cu consecuencia cu personanan lo uza e vulnerabilidad aki den nan beneficio.

Un similaridad entre personanan cu a wordo abusa emocionalmente y neglisha emocionalmente como mucha ta cu tur dos lo por sinti bashi, confundi y sin animo. Loke ta trata maneha emocionnan y expresa esaki na un manera saludabel ta keda un obstaculo pa personanan cu a experiencia abuso emocional & negligencia emocional (Webb, 2016).

Pa mas informacion yama Fundacion Respeta Mi na 582-4433

Pa conseho y guia tocante lantamento di mucha yama Tienda di Educacion na 161 (gratis) of Fundacion Pa Nos Muchanan na 588-0856

Fuente:

Kaptein, M. (2017). Emotionele verwaarlozing. Busca ariba 19 di maart 2019, di https://www.depsycholoog.nl/emotionele-verwaarlozing/#9

Oosten, N. van (2018). De late gevolgen van emotionele mishandeling en verwaarlozing.Busca ariba 19 di maart 2019, di https://www.movisie.nl/artikel/late-gevolgen-emotionele-mishandeling-verwaarlozing

Webb, J. (2016). The Surprising Difference Between Effects of Abuse & Neglect. Busca ariba 19 di maart 2019, di https://blogs.psychcentral.com/childhood-neglect/2016/03/the-surprising-difference-between-effects-of-abuse-neglect/